【傑志90週年之榮譽時刻- 林嘉緯+盧均宜】
2021-09-07

自2010/11賽季傑志重奪47年來首個頂級聯賽冠軍,傑志展開了光輝時代,當中功臣不得不提盧均宜和林嘉緯,但二人笑言:「我們由細到大都『二奶命』,加盟傑志之前無奪過冠軍,之後就勢如破竹。」二人分別在2007和08年加盟時被外界視為當打球員,然後兩人便與傑志一起成長,與「藍鳥」一同締造榮譽時刻。



個子矮小「二奶命」打出一片天



二人效力傑志十個球季,由年青球員成長至獨當一面的球星,林嘉緯回憶說:「初出道時人人都話我有潛質,但點發揮呢?幸得傑志信我,重用我。」盧均宜亦不介意以自己身型幽默一番:「傑志引入巴塞踢法,簡直係為我哋啲矮仔度身訂造﹗」



二人異口同聲指傑志的時光,對個人成長影響甚遠:「當時本地足球都會有一種意識,本地球員踢得再好,主要任務都係協助外援入波,但在傑志令所有崗位的球員都有所發揮,而良性互動亦令外援球員信任你、俾波你。我現在也跟年輕球員講,不要當作自己是配角,做好自己,每個球員都有自己的耀眼時刻﹗」嘉緯以自己的成功經驗勉勵後輩。



然而,打破文化差異的邊界,靠的始終是足球這共同語言。



足球員的浪漫



盧均宜回想起有一次到西班牙巴塞羅拿集訓,大家在為Jessica慶祝生日,本身是西班牙人的盧比度(現時東方龍獅主帥)突然爆喊離席:「我哋出去睇佢咩事,見到佢一個人望海飲泣,我哋咪成班人圍住佢,氹返佢開心。佢由自己家鄉流落異鄉踢波,又同家人分開,離鄉別井的失落感,大家都踢波,唔洗講嘢大家都明。」



此後大家的友誼,亦衝破了「嘻嘻哈哈」的層次:「到盧比度結束足球生涯的最後一場波,完場時都一樣,大家無需言語,彼此對望,兩行眼淚已經流咗落嚟。」



球員穿梭效力不同球會,幾乎是足球生涯必經,但盧均宜承認,離別一刻也難免傷感:「輪到我最後一場傑志比賽完場,同黃洋、王振鵬等隊友四目交投,大家的眼淚已經湧出嚟,呢一個時候大家俾我嘅擁抱勝過千言萬語。」



咁,倒戈呢?



盧均宜:「我首次倒戈,去到球場望住到場的對手是一個個昔日隊友,那感覺百般滋味在心頭,但我同自己講﹐我會更用心踢,不是為了證明自己能力,而是要用更好表現去尊重對手。呢種微妙感覺,我諗世上得足球先有。我唔係講笑,我同佢(嘉緯)咁好朋友,對賽我差點打爆佢隻眼。」林嘉緯亦表示不能認同更多:「你想像吓,黃洋同我以前拍住上,互相輔助,之後對賽我就係要對住佢。」



盧均宜指在傑志的難忘時刻多不勝數,在勝出2011/12最後一場聯賽賽事,捧起當屆聯賽冠軍獎盃前一刻,在一眾隊友及球迷前求婚,抱得美人歸;還有一次出國集訓「無意中」留下了球隊管理「波記」在機場:「抵埗後大家上巴士去酒店,朱SIR問有無人未上車,無人應咪開車,點知上了高速公路發現留低咗波記喺機場。」今日說起仍猶如昨天。



對均宜和嘉緯來說,傑志的榮譽時刻,已印在生命軌跡之中。